Қызылордада қатты жел ұшырып әкеткен үйдің шатыры электр желісіне ілініп қалды

ҚЫЗЫЛОРДА. ҚазАқпарат - Қызылордада қатты жел салдарынан тұрғын жайдың шатыры ұшып, жоғары кернеулі электр желісіне ілініп қалған.

Оқиға орнында жұмыс істеген құтқарушылар төтенше жағдайдың алдын алды, деп хабарлайды ҚазАқпарат.

Оқиға бүгін, 17 мамырда облыс орталығындағы «Арай» шағын ауданындағы тұрғын үйлердің бірінде болды. Қатты жел салдарынан тұрғын жайдың шатыры ұшып кетті.

«Жоғары кернеулі электр желісіне ілініп қалған қаңылтыр жабындыны тұрғындар өз күшімен түсіре алмаған. Содан кейін құтқарушылардың көмегіне жүгінді. Оқиға барысында қаза тапқандар мен зардап шеккендер жоқ», - деп мәлім етті облыстық Өрт сөндіру және авариялық құтқару жұмыстары қызметінің баспасөз хатшысы Әлия Ережепова.

Еске салсақ, бүгін Қызылорда трассасында 5 адам мінген көлік каналға құлап кетті.