Қызылордада ет өнімдерінің жартылай фабрикаттарынан ішек таяқшалары бактериясы анықталды
Қызылорда облысының санитариялық-эпидемиологиялық бақылау департаменті мамандары өнімнің қауіпсіздігіне мониторинг жасау мақсатында бірінші жартыжылдықта 1 111 сынама іріктеп алды. Олардың 72,3% -і тағам өнімдері болса, қалғаны тамақ емес өнімдер үлесіне тиеді.
Сараптама нәтижесі бойынша өнімдердің 86 үлгісі техникалық регламент талабына сай емес екені анықталды. Атап айтқанда, 14-інде микробиологиялық, 6-ауында физикалық-химиялық, 60-ында таңбалану бойынша кемшіліктер бар.
«Ет өнімдерінің жартылай фабрикаттарынан ішек таяқшасы тобының бактериясы анықталды. Физикалық-химиялық көрсеткіштер бойынша сәйкессіздіктер кілегейлі май, ультрапастерленген сүт өнімінде анықталды. Мәселен, май қышқылдарының массалық үлесінің қосынды пайызы бойынша техникалық регламенттер талабына сай емес. Сондай-ақ, сергітетін энергетикалық сусын құрамындағы кофеин нормадан тыс екендігі белгілі болды. Бұдан бөлек, ет өнімдерінің жартылай фабрикаттарындағы ылғалдылық көрсеткіштері де шамадан тыс болып шықты», - деп мәлім етті департаменттен.
Ведомство мәліметінше, техникалық регламент талабына сәйкес келмеген тағам өнімдері сатылымнан алынды.
Еске салсақ, бұдан бұрын Қызылордада санитарияны сақтамаған асханаларға 1,4 млн теңге айыппұл салынды.