14:11, 19 Сәуір 2017 | GMT +6
Қызылордада ауыл мектебінің директоры сотталды
ҚЫЗЫЛОРДА. ҚазАқпарат- Жалағаш аудандық соты ауыл мектебінің директорына қатысты қылмыстық істі қарап, үкім шығарды, деп хабарлады ҚазАқпарат ХАА тілшісі.
Облыстық соттан мәлім еткендей, мектепте директоры өзінің лауазымдық өкілеттігін пайдалана отырып, азаматша М.-нан атқарып жүрген қызметінің үстіне 0,5 жүктеме қосып бергені үшін 5 мың теңге талап еткен.
Мектеп директоры аталмыш соманы алу барысында ұсталды.
Сот үкімімен білім мекемесінің басшысы Қазақстан Республикасы Қылмыстық Кодексінің 366-бабы, 1-бөлігіне (пара алу) сәйкес кінәлі деп танылды. Оған дүние-мүлкін тәркілеу, білім беру саласында лауазымдарды атқару құқығынан өмір бойына айыру, параның 50 еселенген сомасы мөлшерінде (250 мың теңге) айыппұл салу жазасы тағайындалды.