Қызылордада аударылған автобус: Құтқарушылар оқиға барысын баяндап берді
«Құтқарушылар оқиға орнына жете салысымен жол апатына ұшыраған азаматтарды құтқару шараларына кірісіп кетті. Дегенмен, 6.40-та үш адамның мәйіті табылды. Арада 15 минут өткенде тағы бір адамның жансыз денесі сыртқа шығарылды. Ал 7.15-те құтқарушылар екі адамның мәйітін тапты. Құтқарушылар 7 адамның денесін сыртқа шығарды. Барлығы «Саутс-ойл» компаниясында қызмет атқарған. Бізге белгілі болғандай, компания әрбір айдың 2 және 17 күндері ұжымда еңбек ететін мамандарды ауыстыру жұмыстарын жүргізген. Сондай мамандарды алып келген 4 автобус кеше адамдарды алып қайтқан. Кеше, 2 желтоқсанда Қызылорда облыстық төтенше жағдайлар департаменті облыс аумағында көктайғақ, тұман және қатты жел болатыны жөнінде ұялы байланыс операторлары арқылы хабарлама таратқан болатын. Дегенмен оған қарамастан қауіпсіздік шаралары сақталмауы салдарынан оқыс оқиғаға жол беріліп отыр», - деп мәлім етті Қызылорда облыстық төтенше жағдайлар департаментінің бастығы Омар Бержанов.
Тағы бір адам жедел жәрдем көлігінде көз жұмды. Қазіргі таңда көз жұмған азаматтардың жеке тұлғасы анықталуда. Оқиғаға жолдағы көктайғақ себепші болуы мүмкін деген жорамал айтылды.
«Бұл орайда аталмыш компанияның басшылық құрамы тиісті сала мамандарымен бірлесе жұмыс жүргізді. Алғашқы мәліметтерге сүйенсек, олар - Түркістан облысы мен Шымкент қаласында тұратын азаматтар», - деді Қызылорда облыстық полиция департаменті бастығының бірінші орынбасары Шамшидин Әмитов.
Естеріңізге сала кетелік, аталмыш оқиға бүгін таңғы 04.30 шамасында болды. Оқиға салдарынан 8 адам қаза тауып, 21 адам емдеу орындарына жатқызылды.
Оқиғаға байланысты ҚР Ішкі істер министрлігі түсінік берді.
Сондай-ақ, сегіз адамның өмірін қиған «Қызылорда-Құмкөл» жолындағы автобус апатына байланысты қылмыстық іс қозғалды.
Мемлекет басшысы Қасым-Жомарт Тоқаев автобус апатынан көз жұмған марқұмдардың жақындарына көңіл айтты.