Қызылорда облысында вакцинация пунктері аптасына 7 күн жұмыс істейді
Бұл жұмыстар 29 сәуірден бастап жүргізілуде. Қатерлі індетке қарсы екпе салу аймақ бойынша барлық емхана мен егу орындарында аптасына 7 күн бойы үзіліссіз жүзеге асырылады. Тұрғындар таңғы сағат 08.00-ден түнгі сағат 00.00-ге дейін вакцина салдыра алады. Коронавирус инфекциясына қарсы екпе салдыру халыққа енді кез келген уақытта қолжетімді болмақ.
«2021 жылдың 29 сәуірінде облыс бойынша барлығы 5024 тұрғынға коронавирусқа қарсы екпе жасалды. Ал 1 ақпан-29 сәуір аралығында қала бойынша 19113 , аудандар бойынша 13655 адам вакцина салдырды. Олардың жалпы саны 32768 адамды құрайды. Екпе алған тұрғындар дәрігерлер бақылауында, денсаулық жағдайларына шағымы жоқ», - деп мәлім етті Қызылорда облыстық Ішкі саясат басқармасынан.
Еске салсақ, 1 ақпаннан бері Қызылорда облысында 28 мыңға жуық адам коронавирус вакцинасын салдырғанын жазған едік.