Қызылорда облысында модульді инфекциялық аурухана ашылады
Облыстық денсаулық сақтау басқармасының мәліметінше, аймақта коронавирус дерті асқынған жағдайда 21 инфекциялық және провизорлық емдеу орындары қайта ашылады. Олардың жалпы саны 3 мың орынды құрайды. Сондай-ақ, бүгінде тез соғылатын құрылыс заттарынан салынған 200 адамдық модульді инфекциялық аурухана жақын күндері пайдалануға беріледі деп күтілуде.
Аймақта медициналық құрал-жабдықтармен қамтамасыз ету деңгейі артып келеді. Бастапқыда өкпені жасанды желдету (ИВЛ) аппараттарының саны 76 болса, қазір 244 данаға жетіп отыр. Оған қоса, жергілікті бюджеттен 4 флюро және 6 дана стационарлы рентген аппаратын сатып алу жоспарлануда.
Көпбейінді облыстық аурухана базасында оттегі станциясы іске қосылды. Ал Қазалы ауданында 1 оттегі станциясы салынуда.
«Шілде айынан бастап емханалар деңгейінде қала, аудан әкімдіктерімен бірлесіп, үй жағдайында дәрігерлік және динамикалық бақылауды қажет ететін 161 мобильді бригада ұйымдастырылды. Олардың әрбірі 5 мың адамға қызмет көрсетті. Бригадалардың 38-і қалада болса, 28-і аудан орталықтары және 95-і елді мекенде жұмыс жасады», - деді облыстық Денсаулық сақтау басқармасы басшысының орынбасары Олжас Искаков.
Жедел жәрдем қызметіне жергілікті бюджет есебінен лизинг арқылы толығымен жабдықталған 40 жедел жәрдем реанимобильдері жеткізілді. Одан бөлек, 2 жылжымалы медициналық кешен кілттері Жалағаш, Қармақшы аудандық ауруханаларына тапсырылды.
Естеріңізге сала кетелік, Қызылордада коронавируспен күреске қарсы медицина қызметкерінің резерві құрылды.