Қыздар ветеринария мамандығын неге таңдайды

НҰР-СҰЛТАН. ҚазАқпарат - ҚР Парламент Мәжілісінің депутаттары Үкімет басшысының атына сауал жолдады, деп хабарлайды ҚазАқпарат тілшісі.

Депутат Роман Кимнің айтуынша, соңғы жылдары ветеринария саласында біраз реформалар жасалды. Ауылды жерлерде жұмыс істейтін мамандардың жалақысы 25 процентке көтерілді. Алайда аталған шаралардың нәтижесі шамалы.

"Әсіресе, ветеринар мамандарды даярлау мәселесі өзекті болып тұр. Бүгінде ауылдардың үштен бір бөлігі ветеринарсыз отыр. Ал ондай мамандар бар болса да, қағазбасты жұмыстан шыға алмай жатады, я болмаса, мүлдем кәсіби біліктілігіне сай келмейді. "Дипломмен ауылға" бағдарламасы да күткен нәтижені бермеді. Себебі жергілікті атқарушы органдардың тарапынан қажетті әлеуметтік қолдау шаралары болмады. Соның ішінде арнайы жәрдемақы мен баспана мәселесі бар. Осылайша, ауылдағы маман тапшылығы созылмалы ауруға айналып кетті. Соның салдарынан ветеринария қызметі өз міндетін толығымен орындамай отыр", - деді Р.Ким.

Оның сөзіне қарағанда, зерттеулер бойынша соңғы үш жылда жоғары оқу орындары 2 181 ветеринар маманды даярлап шықты. Соның ішінде 1 388 адам - қыздар.

"Олардың көбісі басқа мамандыққа түсе алмағасын ветеринарияға тапсырған. Демек, "дипломды алсам болды" деген оймен келген. Сөйтіп, гранттар мамандықты іздеп келген адамдарға беріліп жатқан жоқ. Ондай түлектер оқуды бітіргеннен кейін ауылға жұмыс істеуге бармайды. Негізі, ветеринария бойынша бітіргендердің тең жартысы өз мамандығы бойынша жұмыс істемейді. Ал осы жолды шын көңілмен таңдағандар жергілікті жерде көптеген қиындықтарға тап болады. Ол - жалақының төмен болуы мен баспана мәселесі. Осылайша, мемлекеттік гранттардың саны көбейсе де, одан келетін пайда шамалы. Бір сөзбен айтқанда, бюджет ақшасын желге шашып жатырмыз", - деп атап көрсетті Р.Ким.

Осы орайда депутаттар ветеринария саласын дамытуға қатысты бірнеше ұсыныс жасады. Біріншіден, ауыл шаруашылығы мамандықтары бойынша мемлекеттік тапсырысты арттыру қажет. Екіншіден, ауылда жерлерде мал мен құсты емдеумен айналысатын ветеринар мамандардың жалақысына қосымша ақы төлеу керек. Үшіншіден, жергілікті атқарушы органдар жас мамандарға барынша қолдау жасауы тиіс. Төртіншіден, депутаттар агроөнеркәсіп кешеніне қажетті мамандарды даярлау бойынша мемлекеттік тапсырысты қалыптастыру құзіретін ҚР Ауыл шаруашылығы министрлігіне беруді ұсынды.