10:38, 23 Қаңтар 2022 | GMT +6
Қытайдың солтүстік-батысында 5,8 балдық жер сілкінісі болды
БЕЙЖІҢ. ҚазАқпарат - Жексенбіде Қытайдың солтүстік-батысындағы Цинхай провинциясының Дэлинха қаласының жанында 5,8 балдық жер сілкінісі болды, деп хабарлайды ҚазАқпараттың меншікті тілшісі Қытай сейсмология орталығына сілтеме жасап.
Жерасты дүмпулері Қытайдың солтүстік-батысындағы Цинхай провинциясы Дэлинха қаласының жанындағы Хайси-Моңғол-Тибет автономиялық ауданында тіркелді.
Жер сілкінісінің ошағы 8 км тереңдікте жатыр. Дэлинха қаласында 90 мыңға жуық адам тұрады.
Зардап шеккендер мен қираулар туралы ақпарат түскен жоқ.
Цинхай провинциясы - Цинхай-Тибет тауларының солтүстік-шығыс бөлігінде, теңіз деңгейінен жоғары биіктікте орналасқан, сейсмикалық қауіпті аймақ.
Естеріңізге сала кетейік, сенбі күні түстен кейін Бейжіңде 2,0 балдық жер сілкінісі болды.
Жерасты дүмпулері мегаполистің солтүстік-батысындағы Чанпин ауданында тіркелді. Ошағы 15 км тереңдікте орналасқан.
Қытай астанасының осы аймағында 2,26 миллионнан астам тұрғын тұрады.