Қытайдағы ұшақ апаты: Жолаушылар арасында қазақстандықтар болмаған

НҰР-СҰЛТАН. ҚазАқпарат – Қытайдың оңтүстігінде апатқа ұшыраған ұшақтағы жолаушылар арасында қазақстандықтар жоқ, деп хабарлайды ҚазАқпарат тілшісі.

«Алдын ала мәлімет бойынша аталған ұшақтағы жолаушылар арасында біздің елдің адаматтары болмаған», - делінген Қазақстан Сыртқы істер министрлігі таратқан мәліметте.

Еске сала кетейік, Қытайдың оңтүстігіндегі Гуанси-Чжуан автономия ауданында China Eastern Airlines әуе компаниясының Boeing 737 жолаушылар ұшағы апатқа ұшырады.

Қайғылы оқиға Қытайдың Гуанси-Чжуан автономиялық ауданындағы биік таулы аймақтарда болды.

Ұшақ бортында 132 адам – 123 жолаушы және 9 экипаж мүшесі болған.

Мемлекет басшысы Қасым-Жомарт Тоқаев ҚХР Төрағасы Си Цзиньпинге көңіл айту жеделхатын жолдады.