Қытайдағы балабақшаға жасалған шабуылдан үш адам мерт болды

БЕЙЖІҢ. ҚазАқпарат – Цзянси провинциясында (Шығыс Қытай) балабақшаға жасалған қарулы шабуыл салдарынан үш адам қаза тауып, алтауы жараланды. Бұл туралы «Бэйцзин жибао» газеті оқиға орын алған Цзянси провинциясының Анфу уезінің қоғамдық қауіпсіздік басқармасына сілтеме жасап жазды, деп хабарлайды ҚазАқпарат меншікті тілшісі.

Басылымның мәліметінше, 48 жастағы қарулы ер адам бейсболка мен маскамен жеке балабақшаға кіріп, бөлмедегі адамдарға шабуыл жасаған. Шабуыл салдарынан үш адам қаза тауып, алты адам түрлі дәрежедегі жарақат алды.

Оқиға сәрсенбіде жергілікті уақыт бойынша 10:22-де Қытайдың шығысындағы Цзянси провинциясының Анлу уезінде болған. Қазіргі уақытта жергілікті полиция қылмыскерді іздестіруде. Жаңалықтар хабарламасында шабуыл жасаушының мақсаты және қылмысты жасау үшін қандай қару қолданғаны көрсетілмеген.

Жергілікті полиция қылмысты ашуға ықпал ететін ақпаратты бергені үшін 50 мың юань (шамамен 7,3 мың доллар) сыйақы жариялады.

Фото: Global Look Press/Costfoto