Қытай Қазақстанға 3 миллиард АҚШ доллары көлемінде несие бөлуі мүмкін
Бұл туралы бүгін Астанада өткен брифингте «Самұрық-Қазына» Ұлттық әл-ауқат қоры» АҚ басқармасының төрағасы Қайрат Келімбетов мәлім етті, деп хабарлайды ҚазАқпарат.
«Түстен кейін «Самұрық-Қазына» қоры мен Қытайдың мемлекеттік даму банкі арасында 3 миллиард АҚШ доллары көлеміндегі жаңа несиелік желі туралы келісімге қол қою жарияланады деп күтудеміз. Бұл да біздің бемлекет басшыларының арасындағы келісім аясында», - деді Қ. Келімбетов.
«Бұл - жаңадан қарастырылып отырған 3 миллиард. Біз осы қаржыға металлургия және инфрақұрылым саласындағы жобаларды қаржыландыруды жоспарлап отырмыз», - деді ол.
Қ. Келімбетовтың айтуынша, Павлодар облысындағы алюминий зауытының екінші кезегін Қытайдың Эксим банкі тарапынан қаржыландыру мүмкіндігі қарастырылуда. Бұл - ENRC компаниясының жобасы. Сондай-ақ «Қазақмыс» компаниясының бірқатар жобаларын қаржыландыру қарастырылып жатыр.