Қытай қазағы Тоқтарбек Таңатхан екі дүркін олимпиада жеңімпазын ұтты

АСТАНА. ҚазАқпарат – Ташкент қаласында ерлер арасында өтіп жатқан бокстан әлем чемпионатында Қытай құрамасындағы қазақ жігіті Тоқтарбек Таңатхан сенсация жасады, деп хабарлайды ҚазАқпарат тілшісі.

Тоқтарбек Таңатхан 80 келіге дейінгі салмақта ширек финалда екі дүркін олимпиада жеңімпазы, әлем чемпионы Арлен Лопеспен шеберлік байқасты.

Тоқтарбек атақты қарсыласынан қаймықпай, айласын асыра білді.

Сөйтіп, ол жартылай финалға өтіп, жүлдегерлер қатарына ілікті.

Еске сала кетейік, бұдан бұрын Қытай құрамасындағы қазақ боксшысының әлем чемпионатында қарсыласын нокаутпен ұтқанын жазған едік.

Сондай-ақ Қазақстан құрамасынан Дулат Бекбауов ширек финалға өтті. Ал Нұрқанат Райыс пен Серік Теміржанов ширек финалға шыға алмады.

Қарсыласын екі рет нокдаунға жіберген ұлттық құрама капитаны Асланбек Шымбергенов пен Нұрбек Оралбай жартылай финалға өтті.