Қырғызстанда COVID-19 вирусын жұқтырған 11 пациенттің жағдайы ауыр

БІШКЕК. КАБАР – ҚазАқпарат – Қырғызстанның Денсаулық сақтау министрінің орынбасары Мадемин Қаратаев брифингіде елдегі эпидемиологиялық жағдай туралы шұғыл ақпарат таратты, деп хабарлайды ҚазАқпарат Кабар агенттігіне сілтеме жасап.

Мадемин Қаратаевтың айтуынша, қазіргі уақытта COVID-19 коронавирус инфекциясы диагнозы қойылған 11 пациенттің жағдайы ауыр. 6 науқас жансақтау бөлімінде жатыр.

Қырғызстанда 12 сәуір сағат 10:00-дегі жағдай бойынша COVID-19 инфекциясын жұқтырған 38 жаңа оқиға тіркелді.

Олардың ішінде 12 медицина қызметкері бар. Елде коронавирус жұқтырғандардың жалпы саны 377 адамға жетті. Ал республика бойынша 63 дәрігер COVID-19 коронавирусын жұқтырған.

Сондай-ақ, елде бес адам вирустан көз жұмды. Бүгінге дейін 54 пациент сауығып, ауруханадан шығарылды.