Қырғызстан шетелдік мамандарға «Цифрлық көшпенді» мәртебесін береді

БІШКЕК. ҚазАқпарат - Қырғызстанда шет елдердің 600-ден астам IT маманы «Цифрлық көшпенді» мәртебесін алу үшін өтінім берген, деп хабарлайды ҚазАқпарат тілшісі Қырғыз Республикасының Еңбек, әлеуметтік қамсыздандыру және көші-қон министрлігіне сілтеме жасап.

Бұл мәртебе шетелдік IT-мамандарға Қырғызстан аумағына визасыз келуге мүмкіндік береді. Сондай-ақ келгеннен кейін тіркеуден өтудің қажеті жоқ. Ал жұмысқа орналасу үшін рұқсат құжаттары талап етілмейді. Сонымен қатар «Digital Nomad» мәртебесі жеке сәйкестендіру нөмірін (ЖСН) автоматты түрде алуға, сондай-ақ әділет және салық салу саласындағы уәкілетті мемлекеттік органдарда оңайлатылған тәртіпте қызмет алуға мүмкіндік береді.

«Цифрлық көшпенді» мәртебесін алуға Қазақстан, Әзербайжан, Армения, Беларусь, Молдова және Ресейдің цифрлық технология саласында қызмет ететін азаматтары өтінім бере алады.

Мәртебе арнайы QR-коды бар электронды құжат түрінде беріледі.

«Цифрлық көшпенді» мәртебесін беру туралы уақытша ереже 2023 жылдың 31 желтоқсанына дейін күшінде.