19:01, 22 Шілде 2018 | GMT +6
Қырғызстан мен Қазақстанның СІМ басшылары шекарадағы мәселелерді талқылады
БІШКЕК. ҚазАқпарат - Қырғызстан Сыртқы істер министрі Эрлан Абдылдаев пен Қазақстанның сыртқы саяси ведомствосының басшысы Қайрат Әбдірахманов ықпалдастықтың өзекті мәселелерін талқылады, деп хабарлайды «Кабар» агенттігі Қырғызстан СІМ-нің баспасөз қызметіне сілтеме жасап.
Абдылдаев пен Әбдірахмановтың екіжақты кездесуі 2018 жылдың 20-22 шілдесі аралығында Ыссық-Көлде өтіп жатқан Орталық Азия елдері Сыртқы істер министрлерінің кездесуі шеңберінде өтті.
Екі елдің СІМ басшылары қырғыз-қазақ ықпалдастығының өзекті мәселелерін, соның ішінде көлік және коммуникация, сауда-экономикалық және мәдени-гуманитарлық бағыттарды талқылады. Сондай-ақ алдағы уақыттағы жоғарғы деңгейдегі сапарлардың күнтізбелік жоспары сөз болды.
Бұдан бөлек, Қырғызстан мен Қазақстанның шекараларындағы өткізу бекеттерінің жұмысына, екі ел азаматтарының құқықтары мен мүдделерін қорғауға ерекше назар аударылды.