Қылмыстық қудалау органдарының әрекеттеріне қатысты 2015 жылы 1200 шағым түскен

АСТАНА. ҚазАқпарат - 2015 жылы Қазақстанның қылмыстық қудалау органдарының іс-әрекеттеріне қатысты 1200-нан астам шағым келіп түскен. Бұл туралы бүгін Орталық коммуникациялар қызметінде Жоғарғы соттың қылмыстық істер жөніндегі қадағалаушы сот алқасының төрағасы Абай Рахметуллин мәлім етті.

«Биыл бірінші жартыжылдықта прокурорлардың, тергеу және анықтау органдарының іс-әрекеттеріне немесе олардың керісінше, әрекет етпеуіне қатысты тергеу соттарына 1227 шағым келіп түсті. Олардың үштен бірі тергеушінің әрекетіне қатысты болса, бестен бір бөлігі прокурордың іс-қимылына байланысты болғаны анықталып отыр. Жалпы, 734 шағым қаралды, ол барлық шағымның 59,8 пайызын құрайды. Толықтай немесе ішінара 231 шағым қанағаттандырылды. Процессуалдық шешімдердің әрбір жетіншісі заңсыз болатыны анықталды және белгіленді. Лауазымды тұлғаның әрбір екінші шағымы заңсыз», - деді А.Рахметулин.

Оның айтуынша, шағым түсіргендердің басым бөлігі Алматы мен Астана қалаларының, ШҚО, Қостанай, Қарағанды, Ақтөбе облыстарының тұрғындары.