#КүшімізБірлікте: Тәуелсіздік тағдыры үшін барлық әрекетке дайынбыз – Роза Мұқанова
2022 жылғы 9 қаңтар 11:02

#КүшімізБірлікте: Тәуелсіздік тағдыры үшін барлық әрекетке дайынбыз – Роза Мұқанова

НҰР-СҰЛТАН. ҚазАқпарат – Президент Қасым-Жомарт Тоқаевтың соңғы оқиғаларға жасаған үндеуіне байланысты зиялы қауым да өз пікірін білдіріп, Мемлекет басшысын қолдап жатыр.

«Бізге бебітшілік қымбат! Тәуелсіз елдің болашағы қымбат! Әр қазақстандықтың өмірі қымбат! Біз халқы үшін от жалынға оранып тұрған президент Қасым-Жомарт Тоқаевтың әр қадамын қолдаймыз», - деп жазды ақын, жазушы Роза Мұқанова ФБ парақшасында. «Президент халыққа қарсы қару қолданған бүлікшілер тобын ауыздықтау үшін барлық қадамдарға барды. Қажет болған жағдайда Тәуелсіз елдің тағдыры үшін барлық әрекетке дайынбыз. Алаңда әскерилердің басы кесіліп, домалап жатқанда үйде отырып күпінбеңдер, бауырлар. Фейк жамылып, халықты айдап салушылар құдайдан қорқыңдар!» деп жазады ол.


Ал ҚР Жазушылар одағы төрағасының орынбасары, ақын Ақберен Елгезек елде түсімізге де кірмеген жағдай орын алғанын, қазір бос сөз сапырып саясат соғатын кез емес екенін айтады.

«Қай қайсымыз әр жаққа тартпай, барлық құзыретті қолына алған Президенттің қасына топтасуымыз керек! Жаудың нысаны – қасиетті тәуелсіздігіміз. Сырттан кіріп кеткен террористердің мақсаты қоғамда үрей тудырып, байрағымызды жығып, аяққа таптау. Тәуелсіздіктен айырылсақ, ештеңе де керек болмай қалады. Бір болайық, ағайын!» деп жазды Ақберен Елгезек.


Jańalyqtar

MURAǴAT