Құрық порты бүкіл өңірдің транзиттік әлеуетін біріктіреді

None
None
  АҚТАУ. ҚазАқпарат - Қазақстан бүкіл Еуразия үшін маңызды жобаны жүзеге асырды. Бұл туралы Құрық портындағы мультимодальдық көлік хабын таныстыру шарасында ҚР Президенті Нұрсұлтан Назарбаев мәлім етті, деп хабарлайды ҚазАқпарат.

«Бүгін біз өте маңызды көлік-логистикалық жобаны іске қосқалы отырмыз. Мультимодальдық хаб Құрық портының екінші кезеңінің құрылысы аяқталып, шынын айтқанда, біз соның тойына жиналып отырмыз. Бұл біздің еліміз ғана емес, сонымен қатар, бүкіл Еуразия үшін, әсіресе, бауырлас әрі көрші мемлекеттер үшін маңызды. Яғни, Орталық Азиядағы мемлекеттердің барлығы теңізге шығатын ел деңгейіне жетті. Осы орайда баршамызды бүгінгі салтанатты сәтпен шын жүректен құттықтаймын»,- деді Мемлекет басшысы.

Сонымен қатар, Елбасы бүгінгі «Құрық» портындағы шараның Каспий маңы мемлекеттері басшыларының саммиті қарсаңында өтіп жатқаны өте маңызды екенін атап өтті.

«Жібек жолында жаңғыру идеясын жүзеге асыру - геоэкономикалық тұрақтылықты нығайтудың кепілі болады. Қазақстан Еуропа мен Азия арасындағы трансконтинентальдық тасымалдауды дамыту жолында ауқымды жұмыстарды жүзеге асырғаны жөнінде сала мамандары баяндады. «Құрық» порты Түркия мен Жерорта теңізі арқылы Еуропа елдеріне шығуға бізге мүмкіншілік береді. Бұл бүкіл өңірдің транзиттік әлеуетін арттыратын және бәрімізді біріктіретін дәліз болып саналады», - деді Нұрсұлтан Назарбаев. 

null

Айта кетейік, Құрық порты Каспий теңізінің шығыс жағалауында орналасқан. Ауа райының қолайлылығына байланысты портта қысы-жазы тоқтаусыз автокөлік пен теміржол паромы жұмыс істейді. Каспий теңізі арқылы батыс бағдарда экспорттық әлеуетті күшейту үшін паром қызметін қолдану жайы Мемлекет басшысының 2014 жылғы 11 қарашадағы «Нұрлы жол -Болашаққа бастар жол» атты Жолдауында айтылды. «Нұрлы жол» мемлекеттік бағдарламасының синергиялық жобасы Құрық портында қосарланған технологиялық ифрақұрылымды жасақтауға мүмкіндік берді. Боржақты-Ерсай теміржол желісі салынып, порт айдынына тірелді. Қазіргі кезде Ақтау мен Құрық портын жалғайтын үшінші техникалық категориядағы екі жолақты жолдың құрылысы жүруде. Сонымен қатар, Атырау- Астрахан жолы салынып жатыр. Бұл екі жолды салудағы мақсат - Өзбекстан, Ресей, Қытаймен жүк жеткізу мерзімін азайтып, тауар айналымын күшейту. Бұл ел экономикасын дамытуда жаңа мүмкіндіктерге жол ашады. Жоба аясында Ақтау портының солтүстік жағалауын кеңейту кезінде үш терминалдық нысан іске қосылды. Бұл өз кезегінде басты жүктерді өткізу көлемін екі есеге өсірді

null.

Естеріңізде болса, Құрық портындағы өткізу кешені нысандарының құрылысы 2015 жылы сәуірде басталды. 2016 жылғы 6 желтоқсанда Мемлекет басшысының қатысуымен өткізілген Жалпыұлттық телекөпір кезінде порттың алғашқы өткізу кешені мен теміржол жолы іске қосылды. «Құрық порты бізді Кавказ бен Еуропаға шығарады. Бұл - біздің жаңғыртуды дамытудағы көптен күткен жобамыз»,-деп атап өтті Н. Назарбаев. 

Ал 2017 жылғы 6 желтоқсанда Жалпыұлттық телекөпір кезінде Құрық портындағы Автокөлік айлағы мен автомобиль паромына арналған гидротехникалық ғимарат тестілік режімде іске қосылды. 

2017 жылы 19 қазанда Құрық портының теміржол паромы терминалы алғашқы миллион тонна жүкті өткізді. 2017 жылы 1,5 миллион тонна жүк өткізіліп, 320 кеме портқа кірген. 2017 жылы желтоқсанда Құрық портында «Әзербайжан Каспий теңіз кеме көлігі» ЖАҚ Ro-Ro типіндегі «Бястякар Гара Гараев» кемесімен жеңіл және жүк автокөліктері өткізілді. Паром кешені астық, мұнай өнімдері, тыңайтқыш, химиялық заттар мен басқа да жүктерді өткізе алады. 2018 жылғы 7 айда 1,2 миллион тонна жүк өткізілген. 

Порт аумағында 4 аймақ бар: түсіру-тиеу кешені операциялық жұмыс орны, технологиялық операция өндірістік аймағы, жалпы порттық нысандар аймағы және жолаушылармен жұмыс аймағы.

null

Соңғы жаңалықтар