Кубада FIHAV-2014 халықаралық көрмесі өз жұмысын аяқтады

АСТАНА. ҚазАқпарат - Сенбі күні Кубада FIHAV 32-ші халықаралық жәрмеңкесі өз жұмысын аяқтады. Латын Америкасының ең ірі сауда форумдарының бірі алғаш рет шетелдік инвестицияларға арнап, компанияларға капиталын салу үшін нақты жобаларды ұсынды.

Жәрмеңкеде кубалық тарап капиталды салу үшін «мүмкіндіктер қоржынын» ұсынды. 246 жобаны қамтитын ол 8,7 млрд. долларға бағаланады. Кубада құрылып отырған Мариэль даму аймағы да шетелдік кәсіпорындардың үлкен қызығушылығына ие болды.

Сауда биржасының жұмысы уақытында 20 мың шаршы метрге жуық алаңда экспозициялар орналастырылды. Павильондарға үкіметтік деңгейдегі отызға жуық делегация мен 46 сауда палатасы мен ұйымдардың өкілдері келді. FIHAV 32-ші халықаралық жәрмеңкесіне 60 елден астам елден 4 мыңға жуық экспонент қатысты.