ҚР СІМ отандық костюмдер тігетін кәсіпорындардың тізімін жасауға кірісті
Министрліктің ресми өкілі Айбек Смадияровтың айтуынша, аталған тізім бойынша отандық киім-кешекті сатып алуға міндет қойылмайды. Аталған құжаттың ұсынымдық сипаты болады.
«Қазіргі кезде отандық костюмдерді тігетін және сататын кәсіпорындарың тізімін жасап жатырмыз. Соны барлық дипломаттарға таратамыз. Олар өз қалаулары бойынша сол жерге барып, киінетін болады. Негізі, отандық костюмдердің сапасы шетелдік өнімдерден еш кем емес. Мәселен, мен өзіме жақсы бір костюмді таңдап алдым. Әйтпесе, шетелден келетін өнімдедің бағасы тым қымбат. Енді, тасымалдау шығындары бар, салықтар, дүкеннің жалға алып отырған жері және тағысын тағы. Ал өзімізде тігілген костюмдер әлдеқайда арзанға шығады», - деді А.Смадияров журналистерге берген сұхбатында.
Оның айтуынша, отандық костюмдердің бағасы 20-140 мың теңгенің айналасында. «Мысалы, мен өз костюмімді 85 мың теңге сатып алдым. Келесі жолы міндетті түрде киіп келемін. Қазірдің өзінде киіп тұрған галстугым - отандық өнім. Бұдан бөлек, өзімізде жақсы аяқ киімдер де тігіледі. Алматыда, Шымкентте біраз жігіттер осы кәсіппен айналысады екен. Өздері жасайды, өздері сатады», - деп атап көрсетті А.Смадияров.
Еске салайық, Елбасы Нұрсұлтан Назарбаев отандық кәсіпорындарға қолдау көрсету қажеттігі туралы бірнеше рет айтқан болатын. Бұл мәселені 2018 жылдың қазанында кезекті Жолдауын жариялау кезінде де көтерді.
«Мысалы, қазір осы жерде отырғандардың үстіндегі шетелдік киімдердің бәрін алып қойса, тыр жалаңаш қаласыңдар. Бізде көйлекті де, костюмді де шығара алады. Ондай кәсіпорындарға қолдау жасау қажет. Өз тауарымызды қолдау керек. Өзім талай рет көрсеттім ғой. Мен тек отандық костюмдерді киіп жүремін. Сапасы шетелдік өнімнен еш кем емес. Ал бағасы он есеге арзан. Шетелдік тауарларды неғұрлым аз тұтынсақ, соғұрлым тәуелсіздігіміз мықты болады», - деген болатын Мемлекет басшысы.
Президент биыл 30 қаңтарда өткен Үкіметтің кеңейтілген құрамдағы отырысында министрлер мен әкімдерді отандық киім киюге тағы шақырды.