ҚР Президенті: Таулы Қарабақтағы қақтығысты тоқтату туралы келісім – тарихи шешім

НҰР-СҰЛТАН. ҚазАқпарат – Мемлекет басшысы Қасым-Жомарт Тоқаев Ресей Федерациясының төрағалығымен видеоконференция форматында өтіп жатқан Ұжымдық қауіпсіздік туралы шарт ұйымы Ұжымдық қауіпсіздік кеңесінің сессиясына қатысуда, деп хабарлайды ҚазАқпарат тілшісі.

«Біздің бұл кездесуіміз аймақтағы және жалпы әлемдегі күрделі процестер аясында өтіп жатыр. Аймақтық және жаһандық қауіпсіздік саласындағы жағдайлар мемлекетаралық қарым-қатынаста қақтығыс әлеуетінің артуымен тіпті ушығып барады. Осының аясында Таулы Қарабақтағы әскери қақтығыстарды тоқтату мақсатында жасаған Ресей президенті Владимир Владимирович Путиннің бастамасына ең жоғары баға беруге болады», - деді Қасым-Жомарт Тоқаев сессияда.

Қазақстан Президентінің айтуынша, Ресейдің қатысуымен жасалған келісімді туындаған қиын жағдайдағы ең дұрыс шешім деп атады.

«Бұл келісім аймақтағы ұзақ мерзімді бейбітшілікті қамтамасыз етеді. Менің ойымша, бұл – тарихи шешім», - деді ол.