11:07, 19 Мамыр 2021 | GMT +6
ҚР Президенті Абайды насихаттауға қосқан үлесі үшін Армения профессорын марапаттады
ЕРЕВАН. ҚазАқпарат – Қазақстан Елшісі Болат Иманбаев Ереван мемлекеттік университеті түркітану кафедрасының меңгерушісі, профессор Александр Сафарянға Қазақстан мен Армения арасындағы мәдени, білім салаларындағы байланысты дамыту, сондай-ақ армян тіліне Абайдың «Қара сөздерін», М. Әуезовтің «Абай жолы» романын және «Қазақ әдебиетінің антологиясын» армян тіліне аударғаны үшін Президент Қасым-Жомарт Тоқаевтың алғыс хатын табыс етті, деп хабарлайды ҚазАқпарат.
ҚР Сыртқы істер министрлігінен мәлім еткендей, ғалым өзінің еңбегін жоғары бағалағаны үшін ризашылық білдіріп, екі халық арасындағы қарым-қатынастарды одан әрі нығайтуға дайын екенін растады. Ол Ереван мемлекеттік университеті мен Л. Гумилев атындағы Еуразия ұлттық университеті арасындағы ынтымақтастықты жоғары бағалап, оқытушылармен, ғылыми зерттеушілермен академиялық алмасудағы байланыстарды атап өтті.