ҚР Президенті 17-19 мамырда Қытайға мемлекеттік сапармен барады

АСТАНА. ҚазАқпарат – Президент Қасым-Жомарт Тоқаев биылғы 17-19 мамырда Қытай Халық Республикасына мемлекеттік сапармен барады. ҚазАқпарат бұл туралы Ақордаға сілтеме жасап хабарлайды.

«Мемлекет басшысы Сиань қаласында ҚХР Төрағасы Си Цзиньпинмен келіссөз жүргізеді. Кездесу барысында екі ел арасындағы стратегиялық серіктестікті одан әрі нығайту, сауда және экономика, инвестиция, көлік-логистика, энергетика салаларындағы ынтымақтастықты кеңейту, сондай-ақ мәдени-гуманитарлық байланыстарды тереңдету мәселелері қарастырылады.

Сондай-ақ Президент Қытайдың ірі компанияларының басшыларымен кездеседі деп жоспарланып отыр.

Бұдан бөлек, сапар аясында Қасым-Жомарт Тоқаев «Орталық Азия + Қытай» саммитіне қатысады», - делінген мәліметте.