Қостанайлық серіктестік көпбалалы анаға пәтер алып берді
Қарабалық ауылының тұрғыны Айнагүл Тайыпованың төрт баласы бар. Үлкені - он жаста, кішісіне - бір жарым жыл. Ол осы уақытқа дейін 30 000 теңгеге пәтер жалдап тұрған. Енді отбасы күні Қарабалық орталығындағы абаттандырылған пәтерге ие болды.
«Пәтерге газ, ыстық және суық су кіріп тұр. Балалар да риза. Олардың өз бөлмелері болады. Аулада бау-бақша егуге мүмкіндік жасалған»,- дейді пәтер иесі.
Айнагүл Тайыпова ауылдың қоғамдық жұмыстарына үнемі қатысады. Қазір аспаздық білім алып жатыр. Ал 1 сәуірден бастап Айнагүл атаулы әлеуметтік көмек пен балаларға арналған жәрдемақыны тұрақты түрде алады.
Көпбалалы анаға пәтер кілтін «Агрохолдинг «Астық индустриясы» ЖШС директорының орынбасары Нұрболат Құткужаев табыс етті. Оның сөзінше, бүгінде жергілікті билік пен бизнес сектордың арасында ынтымақтастық қалыптасқан.