Қостанайда жолаушыны автобусқа маскасыз кіргізбеген жүргізуші соққыға жығылды

ҚОСТАНАЙ. ҚазАқпарат – Қостанай тұрғыны маска тағуды талап еткен автобус жүргізушісін соққыға жықты, деп хабарлайды ҚазАқпарат.

Қостанай облысы әкімдігі жанындағы ақпараттық штабтың мәліметіне сүйенсек, оқиға бүгін таңертең болған.

«№11 маршрут автобусының жүргізушісін жолаушы соққыға жыққан. Жүргізуші жолаушыны маскасыз автобусқа кіргізбеген және шығуды өтінген. Алайда жас жігіт талапты елемеген. Маска тағуын талап еткен жүргізушіні ұрып-соғып, автобустан қашып кеткен. Оқиға туралы 102 пультіне хабар түсті. Полиция құқық бұзушыны іздеп жатыр»,- дейді штабтағылар.

Қазір осы дерек бойынша ҚР Қылмыстық кодексінің 293-бабымен тергеу басталды.

Қостанай облысы әкімдігі жанындағы ақпараттық штаб төтенше жағдайлар режимін сақтау бойынша талаптарға түсіністікпен қарауды сұрайды.