16:03, 19 Ақпан 2019 | GMT +6
Қостанайда қар құрсауында қалған 12 балықшы құтқарылды
ҚОСТАНАЙ. ҚазАқпарат - Қостанай облысында қар құрсауында қалған 12 балықшы құтқарылды, деп хабарлайды ҚазАқпарат.
Ақпаратты облыстық ТЖД баспасөз қызметі таратты. Оқиға Жангелдин ауданында болған.
«Бүгін, түнгі 01:30 шамасында Торғай селосынан 20 шақырым жерде қар құрсауында қалған 5 жеңіл автокөлікке көмек көрсетілді. Көліктерде барлығы 12 адам болған. Олар Қабырға өзеніне балық аулауға шықпақ болғаны анықталды», -дейді ведомствоның баспасөз қызметіндегілер.
Құтқарушылар автокөліктерді қардан шығарып, қауіпсіз жерге дейін сүйретіп жеткізді. Балықшылар медициналық көмекке жүгінген жоқ. Облыстық ТЖД боранды күні алыс жолға шықпауға кеңес береді.