Қостанайда із-түзсіз кеткен екі адам бір тәулік бойы қар астындағы жертөледе жатқан
23 қаңтар күні «112» қызметіне Ақсай ауылынан 35 шақырым жерде далалық алқап аумағында қиындыққа тап болған екі адам жөнінде қоңырау келіп түскен. Жерді өңдеуге жаңа техникамен бірге адамдар жіберілген.
«Ауа райының күрт нашарлауына байланысты оларды жедел эвакуациялау қажет болған. Байланыс болмағандықтан төтенше жағдайға ұшыраған адамдардың орналасқан жері мен жағдайы беймәлім болған. Ақтүтек бораннан жол көрінбейді, соған қарамастан іздеу-құтқару жұмыстарын «Нива Марш – Бронто» көлігі жүргізді. Құтқару операциясына Арқалық қаласының бөлімшелері, оның ішінде Қостанай қаласының жедел-құтқару жасағының құтқарушылары Байділдин Ж., Жармағанбетов Е., бас құтқарушы Жанаев А. қатысты. Құтқарушылар бір тәуліктен кейін оларды жертөледен тауып алған» деп мәлім етті комитеттен.
«Табылған азаматтардың жағдайы бірқалыпты. Зардап шеккендер Ақсай ауылына жеткізілді» делінген ТЖК хабарламасында.