Қостанайда дәріхана иесіне пара бергені үшін 6 млн айыппұл салынды

ҚОСТАНАЙ. ҚазАқпарат - Қостанайда лауазымды тұлғаға пара берген жеке кәсіпкер Светлана Мазур сот үкімімен 6 млн теңге сомасында айыппұл төлейтін болды. Бұл туралы «ҚазАқпарат» ХАА тілшісі хабарлады.

Мазур «ҚР ДСМ Медициналық және фармацевтикалық қызметті бақылау комитетінің департаменті» РМБ басшысының міндетін атқарушы Күлзада Өтегеноваға пара берген. Шенеунік Мазурдың дәріханасында анықталған бұзушылықтарды біліп, одан 200 мың теңге талап еткен. Пара екі бөлініп берілген, ақшаның соңғы бөлігін беріп жатқан кезде Өтегенова қылмыс үстінде ұсталды.

Сот Мазурға параның 30 есе сомасы көлемінде айыппұл түрінде жаза кесті. Бұл өмір бойына ұйымдастыру-өкімдік және әкімшілік-шаруашылық функцияларын орындаумен байланысты лауазымды атқару құқығынан айыра отырып,  6 млн теңгені құрайды. Өтегенова бұдан бұрын хабарланғандай, 6 жылға бас бостандығынан айырылды. Алайда апеляциялық сатыда жазаны 21 млн теңге айыппұлға өзгертуге қол жеткізді.