Қостанайда цифрлық хабар тарату жүйесі іске қосылды
1 шілдеден бастап Қостанай облысы телерадио хабарларды тек цифрлық жүйеде көретін болады. Бұл жөнінде «Қазтелерадио» АҚ басқарма төрағасы Ескендір Тәжібеков айтты.
«Қостанай облысында 59 радио-телевизия стансасы салынды. Облыстағы цифрлық хабар тарату үлесі - 98%. 677 елдімекеннің ішінде небәрі 40 ауыл цифрлық жүйеде теледидар көре алмайды. Мұның өзіндік себептері бар», - деді Ескендір Тәжібеков.
Басқосуда қала мен ауыл тұрғындарын ақпараттандыру мақсаты сөз болды. Облыс әкімінің орынбасары Марат Жүндібаевтың айтуынша, 1 шілдеден бастап аналогты хабар тарату тоқтатылады.
«Енді шалғай ауылдардың тұрғындары теледидарды ең жоғары сапада тегін көре алады. Соған байланысты халық арасында ақпарат-насихаттық жұмыстар жүргізу қажет. Себебі, маған белгілі деректер бойынша, Лисаков қаласы респонденттерінің 48%-ы, Денисов ауданы тұрғындарының 48%-ы бұл жаңалық туралы білмейді. Бұл дегеніңіз - үлкен проблема. Кейін опық жейтін біз боламыз. Сондықтан тұрғындарды қазірден бастап құлаққағыс етіңіздер. Мұны қадағалауды ішкі саясат басқармасына тапсырамын», - деді М.Жүндібаев.
Жиын барысында Ескендір Тәжібеков пен Марат Жүндібаев цифрлы хабар тарату жүйесі ресми түрде іске қосты.