Қостанай облысында ЖОО-лардың 1-курс студенттері штаттық оқуға көшеді
Қостанай облысының мемлекеттік санитарлық бас дәрігері Е. Дәулетбаев білім саласына қатысты өзгерістерді жариялады.
Жаңа қаулыға сәйкес 2020-2021 оқу жылының үшінші тоқсанында контингенті 300-ге дейінгі мектептер дәстүрлі оқу форматына көшеді. Бұл ретте сыныптардағы балалар саны 15-тен аспайды және сабақ арасындағы үзілістерде сынып іші дезинфекциялық құралдармен тазартылады.
«Ата-аналардың өтініші бойынша жалпы білім беретін мектептерде 1-ден 5-сыныптарда, халықаралық мектептерде 7-сыныпта кезекші топтар ұйымдастырылады. 9-11(12) сынып оқушылары аптаның 6 күні ішінде аралас оқыту форматына көшеді. Пәндердің 70%-ы штаттық режимде, 30%-ы қашықтан оқытылады. Білім беру мекемесі әкімшілігінің шешімі бойынша сабақтан тыс уақытта 5 адамнан аспайтын топтарда оқушыларды жеке оқытуға рұқсат беріледі. ҚР ММЖТ №67 қаулысының талаптарын сақтай отырып, білім беру объектілеріндегі қоғамдық тамақтандыру орындары жұмысын жалғастырады», делінген санитарлық дәрігердің қаулысында.
Колледждер мен жоғары оқу орындарының I курс студенттері екінші семестрден бастап штаттық оқуға ауыстырылады.
Қостанай облысының мемлекеттік санитарлық бас дәрігерінің қаулысы 2021 жылғы 10 ақпан сағат 00:00-ден бастап күшіне енеді.