03:58, 20 Мамыр 2020 | GMT +6
Қостанай облысында жолаушылар тасымалдайтын көлік жол үстінде өртеніп кетті
ҚОСТАНАЙ. ҚазАқпарат – Қостанай облысында «Volkswagen t4» көлігі отқа оранды, деп хабарлайды ҚазАқпарат облыстық ТЖД баспасөз қызметіне сілтеме жасап.
Оқиға Қашар кентіндегі жанар-жағармай бекеті маңында болған. Жолаушылар тасымалдауға арналған «Volkswagen t4» автокөлігі жол үстінде өртеніп кеткен.
«Өрт ауқымы 4 шаршы метрді құрады. Абырой болғанда зардап шеккендер жоқ. Алдын ала болжам бойынша көлік қозғалтқышындағы сымдар тұйықталып, өрт шыққан. Өрт сөндірушілер келгенше көлік түгелдей жанып кетті. Қазір шығын көлемі есептелуде», - делінген ТЖД баспасөз хабарламасында.