Қостанай облысында өртке байланысты шұғыл желі іске қосылды

ҚОСТАНАЙ. ҚазАқпарат - Қостанай облысындағы табиғи өртке байланысты көмекке мұқтаж халық Төтенше жағдайлар департаментінен ашылған жедел желі телефонына хабарласуына болады, деп хабарлайды ҚазАқпарат.

Бұл туралы ҚР Төтенше жағдайлар министрлігінің баспасөз қызметі хабарлады.

Жергілікті атқарушы органдар эвакуацияланған адамдарды Әулиекөл орта мектебі мен Әулиекөл мектеп-интернатына орналастырды. Төтенше жағдайлар департаментінде 8 717 2 53 32 84, 8 714 2 50 36 24 жедел желі ашылды, психологтардың жұмысы ұйымдастырылды.

«Сонымен қатар көмекке мұқтаж азаматтар 112 немесе 101 телефондарына хабарласуына болады»,-делінген хабарламада.

Сондай-ақ онда Қостанай облысының әкімдігі жергілікті ауқымдағы төтенше жағдайды жариялау мәселесін пысықтап жатқаны айтылған.

«Азаматтық қорғау туралы» Қазақстан Республикасы Заңының 58-бабына сәйкес азаматтар табиғи сипаттағы төтенше жағдайлар салдарынан бүлінуіне немесе жойылуына байланысты нұқсанды өтеуді талап етуге құқылы.

Осыған дейін Қостанай облысындағы орман өрті ауылдарға қарай жалындап, тұрғындар эвакуацияланғаны жазылды.

Мемлекет басшысы Қасым-Жомарт Тоқаев Қостанай облысына жұмыс сапары барысында жедел штабқа барып, өртті сөндіру үшін қабылданып жатқан шаралармен танысуды жоспарлап отырғаны хабарланды.

Өңірде өртке байланысты Ахмет Байтұрсынұлының 150 жылдық мерейтойының шаралар кейінге шегерілді.