Қостанай облысында ірі көлемдегі есірткі тәркіленді
Күдікті ер адам 28 қыркүйек күні Федоров ауданына қарасты Қоржынкөл ауылына келген кезде ұсталған. Ауладағы құрылыс материалдарының арасынан шамамен 4 келі марихуана және 190 грамм гашиш табылды. Сонымен қатар, күдікті қорасынан оқ-дәрі салынған екі қорап жасырған. Бұған қоса ол қорасында тағы да көп мөлшерде есірткі заттарын сақтаған.
«Күдіктінің тұрғылықты жеріндегі із кесу шарасы барысында салмағы 5 290 грамм марихуана және 200 грамм гашиш табылды. Аса ірі мөлшерде есірткі сақтаған азаматқа қатысты ҚР ҚК 297-бабының 1-бөлімі бойынша сотқа дейінгі тергеу шаралары басталды», - деп хабарлады облыстық ІІД баспасөз қызметі.
Жыл басынан бері полицейлер «Көкнар-2017» есірткінің контрабандалық арнасын жою операциясы кезінде 1 351 келі есірткі тәркілеген.