15:44, 13 Қыркүйек 2019 | GMT +6
Қостанай облысында ауыр қылмыстардың барлығы ашылған – полиция
ҚОСТАНАЙ. ҚазАқпарат – Қостанай облысында ауыр қылмыстардың ашылуы - 100%. Бұл туралы ҚР ІІМ қоғамдық кеңесінің отырысында Қостанай облысы полиция департаментінің бастығы, генерал-майор Бекет Аймағамбетов мәлімдеді, деп хабарлайды ҚазАқпарат.
Полиция департаментінің ақпаратынша, Қостанай облысында жан басына шаққандағы қылмыстың жоғары көрсеткіші байқалады. Өңірде орта есеппен 176 қылмыс тіркелген. Бұл - елдегі 3-ші көрсеткіш. «Сондықтан тергеушілерге және криминалдық полиция қызметкерлеріне артылатын жүк ауыр. Осыған қарамастан, өңірде төрт жыл ішінде ауыр және аса ауыр қылмыстар бойынша қылмыстарды ашу деңгейі 81 пайызға дейін жақсарды», - деп атап өтті Б. Аймағамбетов.
Осы уақыт ішінде жергілікті құқық қорғау органдары аса ауыр қылмыстарды 100 пайыз ашуға қол жеткізді. Қылмыстардың дені кісі өлімі, мүлік ұрлығы, тонау, автокөлік ұрлығына қатысты.