Коронавируске бөлінген қаражатты жымқырған күдіктілер ұсталды
«Алматы облысы бойынша Сыбайлас жемқорлыққа қарсы қызмет Алматы облысы Денсаулық сақтау басқармасының «Облыстық жедел және шұғыл медициналық жәрдем станциясы» ШЖҚ МКК директорына, сондай-ақ оның орынбасарына қатысты ауыр сыбайлас жемқорлық қылмыс жасады деген күдік бойынша сотқа дейінгі тергеуді бастады», - Агенттіктің аса маңызды істер жөніндегі тергеушісі Данияр Биғайдаров.
Оның айтуынша, олар коронавирус пандемиясымен күресу бойынша дағдарысқа қарсы шаралар аясында «Денсаулық» мемлекеттік бағдарламасы бойынша бөлінген арнайы жедел жәрдем автомашинасын жөндеу бойынша қызметтер көрсеткені үшін жасалған шарт бойынша орындалған жұмыстар актісіне қол қою арқылы жалпы сомасы 3 024 930 теңге бюджет қаражатын жымқырды деп күдіктелуде.
«Биыл 23 тамызда «Облыстық жедел және шұғыл медициналық жәрдем станциясы» ШЖҚ МКК директоры мен оның орынбасарына қатысты «қамауда ұстау» бұлтартпау шарасы қабылданды. Тергеу жалғасуда», - дейді ол.
Еске салсақ, Мемлекет басшысы Қасым-Жомарт Тоқаев Үкімет Есеп комитетімен бірлесіп 15 қазанға дейін дағдарыспен күресу үшін бөлінген қаражатты жұмсаудың тиімділігіне талдау жасауы қажеттігі туралы тапсырма берген болатын.