Коронавирус: ШҚО стационарларында қанша науқас емделуде

ӨСКЕМЕН. ҚазАқпарат – Шығыс Қазақстан облысында инфекциялық стационарларда 30 адам коронавирустан емделіп жатыр, деп хабарлайды ҚазАқпарат тілшісі.

ШҚО Денсаулық сақтау басқармасы баспасөз қызметінің мәліметіне сүйенсек, өңірде соңғы тәулікте COVID-19 індетін жұқтырған 4 адам тіркелді.

«Бір күнде 14 пациент коронавирустан толықтай сауығып шықты. Қазіргі уақытта облыс бойынша стационар жағдайында 30 науқас ем-дом қабылдап жатыр. Жалпы Шығыс Қазақстандағы стационарларда төсек-орын жүктемесі – 2,4 пайызды құрайды. Жалпы пандемия басталғалы бері аймақ бойынша 59 592 адам вирус жұқтырған», - делінген ақпаратта.

Еске салсақ, өткен тәулікте елімізде 32 адамнан коронавирус инфекциясы анықталғаны хабарланды.