Коронавирус: ШҚО-да 2 мыңға жуық ата-ана баласына екпе салдыруға келісім берді
ШҚО Ақпарат орталығында өткен баспасөз мәслихаты барысында облыстық Денсаулық сақтау басқармасы басшысының орынбасары Элмира Рахымбаева бүгінде өңір бойынша 12 баланың Pfizer вакцинасын салдырғанын мәлім етті.
«Жалпы Шығыс Қазақстанда қазіргі уақытта 2 мыңға жуық ата-ана баласына екпе салдыруға келісім беріп отыр. Барлық мектеп вакцинация науқанын бастауға дайын. Екпе алған балаларда теріс реакция байқалған жоқ. Олар бірнеше күн бойы медицина қызметкерлерінің бақылауында болады. Облыс бойынша коронавирус вакцинасын 80 мыңнан астам бала алады деп жоспарланған», - деді ол.
Элмира Рахымбаеваның айтуынша, аймақ ауруханаларында қауіпті дертке шалдыққан 14 жасөспірім емделіп жатыр. 80 сынып карантинге жабылып, балалар екі аптаға қашықтан оқытуға көшірілген.