Коронавирус: Нұр-Сұлтанда 40 адам жансақтау бөлімінде жатыр

НҰР-СҰЛТАН. ҚазАқпарат – Елорданың қоғамдық денсаулық сақтау басқармасы басшысының орынбасары Гүлназ Досмырзаева қаладағы КВИ науқастарының санын айтты, деп хабарлайды ҚазАқпарат.

«8 желтоқсан күні таңертең қала бойынша инфекциялық стационарларда 359 науқас болды, оның ішінде жансақтау бөлімінде - 40 адам. Өкпені жасанды желдету аппаратында – 14 адам», - деді Гүлназ Досмырзаева әкімдікте өткен брифингте.

Оның айтуынша, жұқпалы аурулар ауруханасына жатқызылған науқастардың саны өткен айлармен салыстырғанда азырақ.

Тиісінше, КВИ науқастарының да 38%-ға, стационарлық емделіп жатқандардың – 27%-ға төмендегені байқалады.

Сондай-ақ, жедел медициналық жәрдем қызметіне жүгінулер мен шақырулар саны 27%-ға азайды.

«Осындай жақсы көрсеткіштерге қарамастан, алғашқы медициналық-санитарлық көмек ұйымдары коронавирус инфекциясы бар пациенттерге үйде қызмет көрсетуді жалғастыруда. Мобильді бригадалар күніне 1-1,2 мың амбулаторлық емделушілердің үйлеріне барады. Мутацияланған вирустың алдын алу және одан қорғау мақсатында елордада халықты коронавирусқа қарсы вакциналау жалғасып жатыр», - деп қорытындылады дәрігер.