Коронавирус: Нұр-Сұлтанда 12 науқас ауыр халде жатыр
Бұл туралы қалалық Қоғамдық денсаулық сақтау басқармасының басшысы Сәуле Қисықова айтып берді.
«Қазіргі уақытта Елордада инфекция жұқтырғандар саны 264 адамға жетті. Оның 48% - ер, 52% - әйелдер. Оның 25% немесе 63 науқас емделіп шықты. Әсіресе, жазылғандар арасында 2 бала және 60 жастан асқан 4 адам, 80 жастағы азаматша бар», - деді басқарма басшысы «Хабар 24» телеарнасындағы брифингте.
Сонымен қатар, 12 науқас ауыр халде, оның 4 өкпені жасанды желдету аппаратына қосылған.
«Бекітілген хаттамаға сәйкес, науқастарға тиісті ем-дом жүргізілуде. Басқа науқастардың жағдайы қалыпты», - деді Сәуле Қисықова.
Бұған дейін басқарма басшысы Нұр-Сұлтанда коронавирус инфекциясынан қайтыс болған адам туралы айтып берген еді.
9-13 сәуір аралығында Нұр-Сұлтан қаласында 4 766 адамға экспресс- тестілеу жүргізіліп, 61 адам ауруханаға жатқызылған .
Жалпы республика бойынша коронавирус инфекциясын жұқтырған 1179 науқас тіркелді.