Коронавирус: Қостанай облысында шектеу шаралары тағы күшейтіледі
ВАК төрағасы, Премьер-Министрдің орынбасары Ералы Тоғжанов жұмыс сапарымен Қостанай облысына барды.
Вице-премьер өңірдегі эпидемиологиялық ахуал жөнінде кеңес өткізіп, жергілікті мемлекеттік органдар басшылығының қабылданып жатқан шаралар туралы есебін тыңдады.
Ералы Тоғжанов биылғы қараша айынан бастап өңірде COVID-19 фактілерінің едәуір өсуі тіркелгенін атап өтті. Қостанай қаласында, Жітіқара, Қарабалық аудандарында эпидемиологиялық жағдайды тұрақтандыру қажеттілігіне ерекше назар аударды.
Вице-премьер өңірдегі эпидемиологиялық жағдайды тұрақтандыру бойынша жергілікті мемлекеттік органдардың жұмысының әлсіздігін атап өтіп, Денсаулық сақтау министрлігі ұсыныстарының сақталуын бақылауды күшейтуді тапсырды.
Сондай-ақ облыстың кейбір қалалары мен аудандарында ПТР-тестілеудің болмауын ескере отырып, бұл қызметтің облыс тұрғындары үшін қолжетімді болуын қамтамасыз етуді жедел шешуді тапсырды.
Еске салсақ, кеше ведомствоаралық комиссияның келісімі бойынша Қостанай облысында 9 қарашадан бастап санитарлық режимді қатаңдату жөнінде бірқатар шара қабылданған болатын.
Сонымен қатар, ВАК облыс әкімдігіне қосымша шектеу шараларын қабылдауды, соның ішінде Қостанай – Қарағанды, Қостанай - Алматы бағыттары бойынша темір жол тасымалдарын аптасына 7-ден 3 ретке дейін қысқартуды және облыс ішінде жолаушылар темір жол құрамдарын тоқтатуға тыйым салуды (облыс әкімдігі айқындайтын орындарды қоспағанда) тапсырды.
Сондай-ақ, өңір басшылығына карантиндік режимді сақтау бойынша мониторингілік топтардың қызметін күшейту, сондай-ақ тұрғындар арасында карантиндік режимді мүлтіксіз сақтау қажеттілігі туралы ақпараттық-түсіндіру жұмыстарын жүргізу тапсырылды.
Жұмыс сапары барысында Премьер-Министрдің орынбасары медициналық нысандарда, атап айтқанда Облыстық ауруханада, медициналық маскалар өндіруші кәсіпорында және дәрі қоймаларында болып, өңірдің коронавирустық инфекцияның ықтимал толқынына дайындығын тексерді.
Өңірдегі эпидемиологиялық жағдай Үкіметтің тұрақты бақылауында.