Коронавирус: Ауру белгілері байқалса, емханаға бармай, жедел жәрдемге хабарласқан жөн

None
None
НҰР-СҰЛТАН. ҚазАқпарат – Нұр-Сұлтан қаласы қоғамдық денсаулық сақтау басқармасының басшысы Сәуле Қисықова коронавирус жұқтырған науқастарды емдеу қағидалары жөнінде айтып берді, деп хабарлайды ҚазАқпарат.

«Бұл стационар қаланың сыртында, бөлек ғимаратта ашылған. Сондықтан, өзге нозологиялық формадағы науқастар бөлек стационарда қаралады. Медқызметкерлер қауіпсіздік шараларын сақтау бойынша арнайы оқытудан өткен», - деді басқарма басшысы Орталық коммуникациялар қызметінде өткен баспасөз мәслихатында.

Оның айтуынша, аурудың басты белгілері - жоғары температура мен жөтел байқалса, үйде отырған жөн.

«Мұндай белгілермен медициналық мекемелерге бармауларыңызды сұраймыз. Оның орнына колл-орталыққа немесе жедел жәрдем қызметіне хабарласып, кеңес алыңыз. Кореяда жаңа инфекцияны жұқтырған науқастар емханаға келіп, тұтас клиникаларды қызметкерлерімен, кезек күткен адамдармен бірге карантинге жапқан оқиғалар болды. Бұл тәжірибе біздің де медициналық ұйымдарда қолданылады. Сондықтан, біздің кеңестерді қатаң ұстануды сұраймыз», - деді С. Қисықова.

Бұған дейін ҚР Денсаулық сақтау министрі Елжан Біртанов елордада коронавирус жұқтырған үшінші адамның анықталғанын хабарлады. Қазақстандық әйел 12 наурыз күні Милан-Мәскеу-Нұр-Сұлтан рейсінен түсіріліп, Нұр-Сұлтан қаласындағы көпбейінді медициналық орталықтың карантиндік стационарына жатқызылған.

Сондай-ақ, науқаспен бір ұшақта болған 20 жолаушы ауруханаға жатқызылды.


Соңғы жаңалықтар