Коронавирус анықталып, базар жабылды – Қостанай облысында фейк-ақпарат тарады

ҚОСТАНАЙ. ҚазАқпарат – Қостанай облысының Арқалық қаласында коронавирус анықталып, базар жабылып жатқаны туралы жалған ақпарат таратқан әйел іздестірілуде, деп хабарлайды ҚазАқпарат.

Облыстық Полиция департаменті баспасөз қызметінің мәліметінше, WhatsApp мессенджері арқылы Арқалықта коронавирус жұқтырған бір адамның тіркелгені туралы ақпарат тараған. Аудио-хабарламада вирус жұқтырған әйелдің қала базарында жұмыс істейтіні, саудагер таяуда ғана Бішкекке тауарға барып келгені айтылған. Сонымен қатар әйел қала базарының, асхананың жабылып жатқаны туралы ақпаратпен бөліскен. Полиция бұл хабарламада айтылған деректерді теріске шығарды.

Департамен қызметкерлері желіге жалған ақпарат жіберген әйелді іздестіріп жатыр.