Қорғаныс министрі Қазақстандағы Үндістан елшісімен кездесті
2021 жылғы 30 қыркүйек 15:32

Қорғаныс министрі Қазақстандағы Үндістан елшісімен кездесті

НҰР-СҰЛТАН. ҚазАқпарат - Елордада Қорғаныс министрі генерал-лейтенант Мұрат Бектанов Қазақстандағы Үндістан Республикасының Төтенше және Уәкілетті Елшісі Шубхдаршини Трипатхимен және Үндістанның әскери атташесі полковник Милан Налавадемен кездесті. Кездесу барысында тараптар өзара қызығушылық тудырған өзекті мәселелерді талқылады, деп хабарлайды ҚазАқпарат ҚР Қорғаныс министрлігінің баспасөз қызметіне сілтеме жасап.

Жүздесу барысында әскери білім беру, жауынгерлік даярлық пен бітімгершілік ауқымындағы ынтымақтастық перспективалары қаралды.

Қорғаныс ведомствосының басшылығы Үндістан әскери атташесінің қазақстандағы бітімгершілік миссиясын дамытуға қосқан үлесін атап өтті. Олардың жүргізіп отырған жұмысының арқасында «Ливандағы БҰҰ-ның уақытша күштері» миссиясына қазақстандық бітімгершілік ротасының Үнді батальоны құрамында қатысуы туралы уағдаластыққа қол жеткізілді. Полковник Милан Налаваденің 2017 жылдан бері жалғасып келе жатқан Қазақстандағы миссиясы осы жылдың қазан айында аяқталады.

Айта кетсек, биылғы жылдың маусымында ҚР ҚМ Бітімгершілік даярлық орталығына барған үнді тарапы осы орталықты дамыту аясындағы өзара іс-қимылды нығайтуға дайын екенін жеткізді.


Jańalyqtar

MURAǴAT