Көпбалалы аналар мен қандастардың мүддесін қорғайтын уәкіл институты құрылмақ

АСТАНА. ҚазАқпарат – ҚР Президенті жанынан әлеуметтік тұрғыда осал саналатын топтың құқықтарын қорғаумен айналысатын уәкіл институты құрылмақшы. «Ашық НҚА» порталында Мемлекет басшысының жарлық жобасы жарияланды, деп хабаралайды ҚазАқпарат тілшісі.

«Жобаны қабылдаудың мақсаты – азаматтардың құқықтары мен заңды мүдделерінің кепілдігін қамтамасыз ету, сондай-ақ олардың бұзылған құқықтары мен бостандықтарын мемлекеттік және қоғамдық институттармен бірлесіп қалпына келтіру мақсатында өз қызметін ерікті негізде жүзеге асыратын Халықтың әлеуметтік осал санаттарының құқықтары жөніндегі уәкіл институты енгізу», - деп жазылған түсіндірмеде.

Жобада уәкілге қандай функция берілетіні айтылған.

«Уәкілдің негізгі мақсаттары осы Жарлыққа қосымшада көрсетілген халықтың әлеуметтік жағынан осал санаттарының құқықтары мен заңды мүдделерінің кепілдіктерін қамтамасыз ету, сондай-ақ мемлекеттік және қоғамдық институттарымен өзара іс-қимылда олардың құқықтары мен бостандықтарын қалпына келтіру болып табылады деп белгіленсін», - делінген құжатта.

Сонымен аталған Уәкіл мына 10 санаттағы азаматтардың құқықтары мен заңдық мүдделерін қоғайтын болады:

1) Ұлы Отан соғысының ардагерлері;

2) жеңілдіктері бойынша Ұлы Отан соғысының ардагерлеріне теңестірілген ардагерлер;

3) басқа мемлекеттердің аумағындағы ұрыс қимылдарының ардагерлері;

4) мүгедектігі бар адамдар;

5) мүгедектігі бар балалары бар немесе оларды тәрбиелеп отырған отбасылар;

6) атаулы әлеуметтік көмек алушылар;

7) асыраушысынан айрылу бойынша жәрдемақы алушылар;

8) жасына қарай зейнет демалысына шыққан зейнеткерлер;

9) қандастар;

10) «Алтын алқа», «Күміс алқа» алқаларымен наградталған немесе бұрын «Батыр ана» атағын алған, сондай-ақ I және II дәрежелі «Ана даңқы» ордендерімен наградталған көпбалалы аналар, көпбалалы отбасылар.