Көпбалалы аналар Аружан Саинмен кездесті

НҰР-СҰЛТАН. ҚазАқпарат - 23 шілде күні ҚР Білім және ғылым министрлігінде көпбалалы аналардан құралған бастамашыл топ мүшелері ҚР-дағы Бала құқықтары жөніндегі уәкіл Аружан Саинмен кездесті, деп хабарлайды ҚазАқпарат.

Министрліктен мәлім еткендей, жүздесу барысында балалардың құқықтарын қорғау саласындағы өзекті мәселелерді бірлесіп талқылау үшін платформа құру келісілді.

Кездесуге ҚР Білім және ғылым вице-министрі Бибігүл Асылова, Денсаулық сақтау, Ішкі істер министрліктерінің, ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның өкілдері қатысты.

«Жиынға қатысушылар диалог барысында балалардың қауіпсіздігі үшін жауапкершілікті күшейтетін және кәмелет жасқа толмағандардың жыныстық қол сұқпаушылығына қатысты қылмыстарға жазаны қатайтатын түзетулерді ұлттық заңнамаға енгізу мүмкіндігін талқылады», - деді министрліктен.