Көмір бағасы қымбаттамайды - Алматы әкімдігі
Қазір қаладағы көмір қоры 120 мың тонна деп бағаланып отыр. Басқарма мамандарының айтуынша, бұл жылдық тұтыну көрсеткішінен екі есе артық. Бүгінде көмір 9 базада сатылып жатыр. Бір тоннаны 12-16 мың теңгеге сатып алуға болады. Түрксіб ауданындағы базаға бүгін 3 вагон - 210 тонна көмір жеткізілді.
Алматы тұрғындары арасында көмірге сұраныс өте жоғары. Отын көп жатпайды, тез сатылып кетеді. Өйткені, қалада 5 мың жекеменшік үйге көгілдір отын кіргізілмеген. Басқарманың мәліметінше, оның 85%-ы көмірмен қамтылып үлгерді.
Алматылықтар жылыту маусымында орта есеппен 50 мың тонна көмір жағады.
«Өткен жылмен салыстырғанда биыл 100 мың тоннаның 70 мыңы қаладағы базаларға жеткізіліп үлгерді. Қазан-қараша айларында тағы 40 мың тонна көмір жеткізіледі. Көмір бағасы өзгермейді, себебі біз көмір базаларымен келісімге отырғанбыз», - деді қалалық кәсіпкерлік және индустриялық-инновациялық даму басқармасының бөлім басшысы Ерлан Омаров.