Колледждегі жарылыс куәгері болған оқиға туралы шын ақпаратты айтып берді - Алматы
«Мұғалім қол гранатасын қолымызға беріп, өзі бірдеңе жазып отырды. Бірақ, ол бұл оқу гранатасы деп айтты. Сондықтан, біз бәріміз аударып-төңкеріп қарадық. Бір кезде бір бала келді де сақинасын жұлып алды. Бірінші тарс еткен дыбыс шықты. 3-4 секундтан кейін қатты жарылыс болды. Шамамыз келгеніміз қаша жөнелдік. Кейін есімнен танып қалыппын. Көзімді ашсам, дәрігерлер көмек көрсетіп жатыр», - деді ол.
Оның айтуынша, жарылыс кезінде класта 17 оқушы болған. «Кішкене кеудем ауырып тұр. Былай денсаулығым жаман емес», - деді Айлина.
«БАҚ-тағы жаңалықтардан көрсеткендей, мұғалім ешқайда қашпаған. Мастер екеуі де сонда болды. Сондықтан, ешкімді кінәламаймыз», - деді оның анасы Светлана Джакупбаева.
Естеріңізге сала кетейік, қарашаның 17-інде Алматыдағы колледжде қол гранатасының жарылуы орын алған еді. Оқыс оқиға салдарынан 1 қыз қаза болып, 12 бала ауруханаға түсті. Қазір олардың 2-нің жағдайы әлі де ауыр.