Көктайғақ: Өскеменде үш күнде 80 адам зардап шекті

ӨСКЕМЕН. ҚазАқпарат – Өскемен қаласында үш күнде көктайғақ салдарынан 80 адам жарақат алды, деп хабарлайды ҚазАқпарат тілшісі.

ШҚО Денсаулық сақтау басқармасы баспасөз қызметінің мәліметіне сүйенсек, соңғы күндері тұрғындар арасында көктайғақ салдарынан жарақат алып, қол-аяғы көгеріп, сынғандар саны күрт көбейген.

Өскемендегі ауруханаларға соңғы 3 күнде 80 адам жүгінді. Оның ішінде 8 азамат ауруханаға жатқызылған.

«Кеше қаладағы медициналық мекемелерге 30 адам келді. Жұртшылыққа тайғанап құлап, қандай да бір жарақат алған жағдайда бірден дәрігерлерге қаралу керектігін ескертеміз», - деп хабарлады ведомство өкілдері.