Көкшетауда жаңа студенттер сарайы салынып жатыр

None
Фото: Ақмола облысы әкімдігі
КӨКШЕТАУ. ҚазАқпарат - Көкшетауда жаңа студенттер сарайы салынып жатыр. Аймақ басшысы Ермек Маржықпаев А.Мырзахметова университеті аумағында қолға алынған нысанның құрылыс жұмыстарымен танысты, деп хабарлайды ҚазАқпарат тілшісі әкімдіктің баспасөз қызметіне сілтеме жасап.

Университет ректоры Мәди Елюбаевтың айтуынша, құрылыс учаскесінің жалпы аумағы 8 мың шаршы метрден асады.

«Студенттер сарайы болашақта екі ғимараттан тұрады. Біріншісі - студенттік амфитеатр, екіншісі - спорт кешені. Қазіргі уақытта әрлеу жұмысы жүріп жатыр, құрылыс материалдары ретінде тас, фиброгипс, металл қолданылуда. Еденге керамикалық плиталар төселеді. Сондай-ақ мұнда концерт залы, дыбыс жазу студиялары, балет, домбыра, яғни студенттердің шығармашылығын кәсіби дамыту үшін қажет нәрсенің бәрі қарастырылған. Спорт кешеніне волейбол, баскетбол залдары кіреді, жеке жаттығу залы, күрес залы бар», - деп түсіндірді Мәди Елюбаев.


Осы ретте құрылыс жұмыстарымен танысқан аймақ басшысы студенттер сарайында келешекте түрлі ауқымды шаралар өткізуге болатынын атап өтті.

«Бұл - өте ерекше жоба, жақсы архитектуралық нысан. Спорт кешенінде республикалық, халықаралық жарыстар өткізуге болады», - деді Ермек Маржықпаев.

Айта кетсек, бұдан бұрын Ақмола облысында 25 жол-көлік инфрақұрылымы жобасы қолға алынғанын жазған едік.


Соңғы жаңалықтар