Көкшетауда кеңседен 900 мың теңгенің мүлкін ұрлағандар ұсталды
ІІД баспасөз қызметінің мәліметіне қарағанда, ағымдағы жылдың 4 қарашасында жергілікті жекеменшік ұйымның 36 жастағы қызметкері хабарласып, белгісіз біреулердің фирма кеңсесін тонап кеткенін айтқан.
Оқиға орнына дереу жеткен полицейлер, ұрылардың кеңсеге пластикалық терезені бұзып кіргендерін анықтады. Ұрылар 2 «Lenovo» және «НР» ноутбуктерін, 7 000 теңге сақталған металл сейф, АИ-92 бензині мен дизель отынының талондарын қолды қылған. Келтірілген шығын көлемі 900 000 теңгені құрады.
«Жедел-іздестіру шарасы барысында Еңбекшілдер ауданының 23 жастағы және Щучинск қаласының 21 жастағы тұрғындары ұсталды. Күдіктілер ұрланған заттың біразын үшінші адамға сатып үлгеріпті. Ал қалғаны иесіне қайтарылды», - деп түсіндірді баспасөз қызметіндегілер.
Қазіргі кезде, күдіктілер уақытша ұстау оқшаулағышына қамалды, олардың үстінен ҚР ҚК 188- бабының 2-бөлімі бойынша қылмыстық іс қозғалды.